"Bavariya" g'alaba qozondi: Noyer rekord qayd etgan bahsda jarohat oldi
"Bavariya" Bundesliganing navbatdagi turida safarda "Maynts" ustidan 2:1 hisobida g'alaba qozondi. Ushbu uchrashuvda Manuel Noyer myunxenliklar tarixidagi eng yoshi katta futbolchiga aylandi. Biroq faxriy darvozabon o'yinda qo'pol xatoga yo'l qo'ydi va eski jarohati qaytalanishi sababli birinchi bo'limning o'zidayoq maydonni tark etdi.
"Bavariya" Germaniya Bundesligasining shanba kungi o'yinida safarda "Maynts" jamoasini 2:1 hisobida mag'lubiyatga uchratdi. Biroq myunxenliklarning uch ochkoni qo'lga kiritganiga qaramay, uchrashuv asosiy posbon Manuel Noyer uchun noxush voqealar bilan esda qoladigan bo'ldi.
40 yosh-u 225 kunlik Noyer mazkur bahsda maydonga tushib, Bernd Drexerni ortda qoldirdi va "Bavariya" libosida rasmiy o'yinda qatnashgan klub tarixidagi eng yoshi katta futbolchi sifatida yangi rekord o'rnatdi. Shunga qaramay, faxriy kiperning harakatlari yana tanqidlar markazida qoldi — birinchi bo'limda uning navbatdagi xatosi mezbonlarning hisobni tenglashtirishiga sal qoldi.
Rekord oqshomi darvozabon uchun omadsiz yakunlandi: Noyer so'nggi paytlarda uni bezovta qilib kelayotgan oyoq jarohati qaytalangani sababli tanaffusga qadar maydonni tark etishga majbur bo'ldi. Uning o'rniga darvozani himoya qilish uchun Jonas Urbig tushirildi.
"Bavariya" g'alabaga erishgan bo'lsa-da, asosiy darvozabon Noyerning yana safdan chiqishi va xatolari klubning darvoza chizig'idagi vaziyatini xavf ostiga qo'yadi.