Debian Linux distribyutsiyasida sun'iy intellekt orqali yozilgan kodlarni taqiqlamaslikka qaror qildi
Debian hamjamiyati ovoz berish yo'li bilan distribyutsiya dasturlash, qo'llab-quvvatlash va hujjatlashtirish jarayonlarida sun'iy intellekt vositalaridan foydalanishni taqiqlamaslikka qaror qildi. Yangi qoidalarga ko'ra, loyiha generativ SI vositalarini qo'llab-quvvatlamaydi ham, taqiqlamaydi ham. Dasturchilar SI yordamida yaratilgan kod uchun to'liq javobgar bo'lib, loyihaning barcha sifat va xavfsizlik standartlariga javob berishi talab etiladi. Shuningdek, SI vositalaridan foydalanilganini ochiqlash tavsiya etiladi, biroq majburiy hisoblanmaydi. Qaror ochiq kodli dasturiy ta'minot hamjamiyatida turli xil bahslarga sabab bo'ldi.
Mashhur ochiq kodli operatsion tizim hisoblangan Debian distribyutsiyasi generativ sun'iy intellekt vositalaridan foydalanishga oid yangi siyosatini qabul qildi. Hamjamiyat a'zolari o'rtasida o'tkazilgan ovoz berish natijalariga ko'ra, Debian loyihasida dasturlash, tizimni qo'llab-quvvatlash va hujjatlashtirish ishlarida generativ SI vositalaridan foydalanish taqiqlanmaydigan bo'ldi. Yangi qoidalar doirasida SI dasturlariga nisbatan na to'liq qo'llab-quvvatlash, na qat'iy taqiq o'rnatilishi ma'lum qilindi.
Yangi qoidalar loyihaga hissa qo'shuvchilar uchun standart talablarni o'zgartirmaydi: qanday vosita orqali yaratilganidan qat'i nazar, barcha kodlar Debian'ning sifat, to'g'rilik, texnik xizmat ko'rsatishga yaroqlilik va qonuniy me'yorlariga javob berishi shart. Loyiha mualliflardan SI bergan natijalarni ko'r-ko'rona qabul qilmaslikni, balki ularni mustaqil ravishda tushunish, tekshirish, testdan o'tkazish va tahrirlashni talab qiladi. Shuningdek, generativ vositalardan foydalanilganini ko'rsatish tavsiya qilinsa-da, bu majburiy shart qilib belgilanmagan.
Ovoz berish jarayonida SI yordamida yozilgan kodlarni butunlay taqiqlash taklifi ham ko'rib chiqilgan edi. Qabul qilingan ushbu qaror hamjamiyatning barcha a'zolari tomonidan birdek ijobiy kutib olinmadi. Ayrim hissa qo'shuvchilar yangi siyosatdan norozi bo'lib, Debian loyihasidagi faoliyatini to'xtatishini ma'lum qildi. Joriy yil boshida Ubuntu tizimini ishlab chiquvchi Canonical kompaniyasi ham sun'iy intellektga nisbatan shunga o'xshash yondashuv sababli ochiq kodli dasturiy ta'minot faollari tomonidan tanqidga uchragan edi.
Ochiq kodli loyihalar va Debian paketlari ustida ishlovchi dasturchilar SI yordamchilaridan qonuniy foydalanishlari mumkin, biroq kod sifati, xavfsizligi va qonuniy javobgarlik to'liq dasturchining o'z zimmasida qoladi.
AI kod muharriridan foydalanishda eng muhim qoida — kichik o'zgarish, ko'rinadigan diff, majburiy test va qaytarish mumkin bo'lgan commit.