Sobiq SpaceX muhandislari po'lat konstruksiyalar ishlab chiqaruvchi robotlashtirilgan zavod qurmoqda
SpaceX kompaniyasining uch nafar sobiq muhandisi sun'iy intellekt va robototexnika yordamida po'lat konstruksiyalar ishlab chiqarishni avtomatlashtirishga qaratilgan 1872 nomli startupga asos soldi. Kompaniya Ogayo shtatining Sinsinnati shahrida Factory One nomli ilk korxonasini ochdi va 2027-yilgacha jarayonlarning asosiy qismini avtomatlashtirishni rejalashtirmoqda. Korxona dastlab AI ma'lumotlar markazlari va modulli yadroviy reaktorlar uchun poydevor vazifasini o'tovchi po'lat karkaslar ishlab chiqarishga e'tibor qaratadi. Loyiha 15 million dollar miqdorida ilk investitsiya jalb qilgan bo'lib, payvandlash jarayonlarida Path Robotics robotlaridan foydalanadi.
SpaceX kompaniyasida Starship tizimining Raptor dvigatellarini ishlab chiqishda ishtirok etgan uch nafar muhandis — Den Sammers, Brayan Monjilio va Maykl Grant yangi loyihaga qo'l urdi. Ular tomonidan tashkil etilgan 1872 startapi po'lat konstruksiyalar ishlab chiqarish jarayonini sun'iy intellekt va robototexnika yordamida avtomatlashtirishni maqsad qilgan. Kompaniya Ogayo shtatining Sinsinnati shahrida joylashgan Factory One korxonasida dastlabki ishlab chiqarishni yo'lga qo'ydi.
Startapning ilk mahsuloti sun'iy intellekt ma'lumotlar markazlari hamda ixcham modulli yadroviy reaktorlar uchun asos bo'ladigan to'rtburchak po'lat ramkalar hisoblanadi. Kompaniya bosh direktori Den Sammersning so'zlariga ko'ra, to'liq 100 foizlik avtomatlashtirishga erishish shart emas — 80 foizlik ko'rsatkich ham samaradorlikni keskin oshirish va malakali ishchi kuchi yetishmovchiligi muammosini hal qilish uchun yetarli bo'ladi. Amerika Payvandlash Jamiyati hisob-kitoblariga ko'ra, 2029-yilga borib AQShda 320 000 dan ortiq payvandchi mutaxassis taqchilligi yuzaga kelishi kutilmoqda.
Ishlab chiqarish samaradorligini oshirish maqsadida 1872 startapi Path Robotics kompaniyasi bilan hamkorlik qilib, robotlashtirilgan payvandlash tizimlarini joriy etmoqda. Standart qo'lda payvandlash bilan solishtirganda, robotlar ish vaqtining 70 foizini to'g'ridan-to'g'ri payvandlashga sarflaydi (odamlarda bu ko'rsatkich 10-12 foiz) va xarajatlarni qariyb 85 foizga qisqartirish imkonini beradi.
Kompaniyaning kelajakdagi modeli ikki asosiy dasturiy ta'minotga tayanadi: mijozning raqamli chizmasini to'liq ishlab chiqarish rejasiga aylantiruvchi «Architect» sun'iy intellekt tizimi va zavoddagi robotlar hamda avtonom transport vositalarini boshqaruvchi «Conductor» tizimi. The O.H.I.O. Fund tomonidan 15 million dollarlik boshlang'ich sarmoya olgan jamoa keyingi 12 oy davomida jismoniy va raqamli jarayonlarni to'liq avtomatlashtirishni rejalashtirmoqda.
AI ma'lumotlar markazlari va infratuzilma loyihalari uchun zarur bo'lgan metall konstruksiyalarni tezroq va arzonroq yetkazib berish imkoniyati yaratiladi, bu esa apparat ta'minoti qurilishini tezlashtiradi.